政壇：醫學界選戰 勢爆大廝殺
喺政改方案投下反對票嘅立法會醫學界議員「怪醫」梁家騮，唔少人估計佢喺明年立法會選舉唔會競逐連任。據聞醫學會前會長蔡堅喺各方「黃袍加身」下，好大機會出選，而醫學界內亦流傳，○八年參選過嘅港大感染及傳染病中心總監何栢良同西醫工會會長楊超發可能會出選，加上佔領行動催生嘅醫學組織「杏林覺醒」一班年輕醫生唔排除加入戰團，醫學界勢面臨一場大廝殺。
怪醫立場一直都無路捉，當年佢以公立醫院醫生身份，就假日工作補水一事同醫管局打官司，成功贏得一班公立醫院醫生支持，○八年僅以八十票險勝何栢良後，一二年連任就以足足一倍票數大勝醫學會前會長謝鴻興。不過，自從投下政改方案反對票後，建制派就唔當佢係自己人，而怪醫亦喺多個政治或民生議題上與建制派立場不一致。加上近年佢自立門戶開設醫務所，任內連生三個子女，所以佢都明示或暗示將來打算「搵真銀」，唔會競逐連任。
蔡堅被看高一線
有醫學界中人指出，早前醫學會會董改選，曾為佔中醫療隊召集人嘅歐耀佳高票當選，醫學會內部就有聲音，建議不如就由佢出選下屆醫學界選舉，但據聞佢已經婉拒邀請，寧願花時間退休後全情投入無國界醫生工作。此路不通後，蔡堅喺政改期間多次質疑醫學會會長史泰祖，做完業界政改問卷調查後再做多次，係咪想「轉軚」支持，蔡堅亦多次表示有意出選，睇嚟以佢嘅江湖地位，出選勝算看高一線。
至於一班年輕醫生喺政改期間成立杏林覺醒，迫使醫學界反對政改方案。據聞佢哋現階段對參選意願大不，因為呢班醫生正值當打時期，如果進入議會，就會減少時間發展專科資格，究竟係咪值得咁樣犧牲，相信要算過度過，倘若一旦參選，預計選情會相當混亂。
