尋日喺一個室內歷奇活動啟動禮見到「亞洲車神」前香港單車運動員「阿寶」黃金寶，原本阿寶出席唔到活動，事關佢太太預產期預計喺呢幾日，但佢囝囝已經出咗世，所以抽到時間出席。問到新手爸爸湊仔有冇困難，佢就話囝囝好乖，只係一到夜晚就唔願瞓覺，搞到佢兩公婆都無晒辦法。

龐愛蘭（右）自爆少做運動，講做運動要返到中學時代。

黃金寶話囝囝一到夜晚就唔願瞓覺，搞到佢兩公婆都無晒辦法。

講起囝囝，順勢問吓佢會唔會考慮追多個啦！阿寶就好錫老婆，話等老婆身體休息好先再追，但兩個就夠晒數嘞！至於會唔會培養囝囝做接班人，阿寶話唔會要求囝囝一定要踩單車，話會尊重番囝囝嘅意願。

同場仲有籌委會主席Scarlett龐愛蘭，佢話平日都冇乜點做運動，只係中學時代有玩跳遠同風帆，仲話以前去過一個玩風帆嘅Camp，最後一日仲因為被蜈蚣咬傷腳所以無得考試添！佢仲話十月會去澳洲探讀書嘅囝囝，依家已計劃緊行程，希望到時兩母子一齊做吓運動增進感情喎。

第一手消息請下載on.cc東網iPhone/iPad/Android/Windows Phone Apps