城中鏡：鄧鉅明樂悠郵
好多政商界名人都趁住暑假同家人敍天倫，尋日喺「港產陀飛輪」創辦人沈墨寧同兒子沈慧林宣布陀飛輪研發室成立活動，見到嚟撐場嘅太子珠寶鐘錶集團主席鄧鉅明同太太鄧宣宏雁，原來佢哋都係啱啱度完假返港。
鄧鉅明兩夫婦同家人啱啱度過郵輪假期，叉足電。
沈慧林（左）最近忙於工作，笑言自己是「空中飛人」。
鄧鉅明透露同家人花咗十八日參與郵輪假期，遊歷英倫三島。佢話：「幾好玩，好靚，依家叉完電要返工。呢個係我人生中第一個長假，好relax。我太太成日叫我休息吓，唔好咁緊張，我都正面回應，一齊去玩。因為喺船上面收唔到電話，可以逼自己休息，偷得浮生半日閒。我偷得十八日閒！」佢又透露囝囝最開心，因於郵輪上時刻都可以食嘢。
話說沈墨寧當面感激鄧鉅明對品牌嘅支持，仲畀咗好多寶貴嘅意見，令佢獲益良多添！而鄧鉅明就話：「我成日去瑞士睇製錶，呢度有晒外地有嘅嘢，係香港人嘅驕傲。佢哋依家幫下一代嘅香港設計師同鐘錶界，令人對香港鐘錶界更有信心，唔單止係做fashion watch，而係複雜嘅陀飛輪。」
沈慧林忙到10月
講番個研發室，沈墨寧話：「本身喺內地都有機芯廠，做咗四十年，依家想將基礎放喺香港嘅技術同人才度。我哋有參與政府嘅鐘錶學徒計劃，有大學生嚟呢度（研發室）上堂。將廠房設喺香港，係提高咗製作成本，不過依家國內嘅成本都一直升緊，所以距離縮細咗。」
而沈慧林更即場展示品牌第一隻喺香港研發同製造嘅陀飛輪腕錶，又透露：「喺12點位置係運天儀，6點位置係地球，成個設計中西合璧。同埋3點位置個陀飛輪係做到喺側面都可以睇到，係需要一個好高嘅技術。」另外，佢透露本星期為品牌馬不停蹄，笑言自己是「空中飛人」。咁幾時放假休息？佢話：「仲未得住，嚟緊要忙九月錶展，到十月先可以放。」
