受歡迎嘅電影好多時都會衍生出唔同類型嘅周邊產品，帶來可觀利潤，有時候仲分分鐘大過電影票房本身嘅收益。不過，著名電腦動畫師及導演、有「史力加之父」之稱嘅許誠毅就話，有時盜版周邊產品仲出得快過正版，所以佢間中都會上網，參考吓盜版生產商點樣將電影內容融入商品之中。

許誠毅

許誠毅尋日出席中華總商會海峽兩岸暨港澳經貿論壇時，講起喺內地製作電影的經歷，話試過一次有齣電影啱啱拍好上映唔夠一個月，已經有一個影迷拎住電影內其中一個角色嘅公仔過來索取簽名，令佢相當驚訝，皆因當時佢忙住拍電影，根本冇時間設計周邊商品，所以一睇就知道係翻版公仔嘞！

雖然係咁，但佢發覺到周邊商品嘅潛力相當大，除咗參考外國一啲大公司如何打造電影周邊產品外，網絡上嘅盜版商品種類亦層出不窮，盜版商品甚至比電影正版產品更厲害，所以佢有時都會上網學習點樣將電影化成玩具，喺內地賺錢。

第一手消息請下載on.cc東網iPhone/iPad/Android/Windows Phone Apps