政壇：張建宗坐輪椅 搏晒老命
由尋日起一連五日，香港傷殘青年協會喺荷里活廣場舉行健障歷奇體驗活動，讓健全人士體驗殘疾人士喺歷奇時遇到的困難。勞工及福利局局長張建宗就試玩咗其中一項歷奇訓練「霹靂啪啦過沼澤」，佢坐喺手動輪椅上越過石春/視障引路徑，以體驗輪椅使用者喺凹凸不平嘅路面上行走情況。佢一開始就出盡力起勢推動輪椅，搏老命向前衝，遙遙領先，快過世界輪椅劍擊金牌得主張偉良。
張建宗（前）坐在輪椅上起勢推，仲快過身後嘅張偉良（後左）。
張偉良喺賽後大讚張建宗一學就上晒手，掌握到推輪椅的技巧，但張建宗就坦言使用輪椅唔係一件容易嘅事，但認為遇到挫折後要勇敢地起身再試，唔可以輕言放棄，自然會成功。今次健障歷奇體驗活動設有五個關卡，大會分設兩條路線，市民只需捐款六十元即可挑戰其中一條路線，籌得款項將作為香港傷殘青年協會營運經費之用。
本港現時較具規模嘅殘疾人士戶外設施地點只有三個，惟早喺一三年，殘疾人士人數已有近五十八萬，活動空間比例嚴重失衡，協會建議政府應增撥土地資源開放無障礙活動空間。
