政壇：搞邊境購物城 象哥諗盡屎橋
有份倡議邊境購物城計劃嘅立法會進出口界議員「象哥」黃定光，早前已加入負責計劃嘅非牟利基金會，仲話基金會已密密開會，計劃購物城各項大小事情，其中一項最重要嘅竟然係諗計點樣處理旅客購物期間留下的大小二便。
象哥話本來諗住好簡單，只係放幾間一格格嘅臨時廁所就搞掂，點知購物城人流太多，相關嘅政府部門話唔可以兒戲，於是佢諗計變招，研究興建廁所，之後駁落政府嘅排污渠，但渠務署又話啲渠負荷唔到，唔批准咁做。
起蓄糞池 月使120萬
跟住佢就諗到解決方法，就係起個蓄糞池，每晚搵九部吸糞車到場吸糞，咁樣計一計，淨係吸糞，每日都使四萬元，一個月要成一百二十萬元，都幾重皮喎！除咗吸糞，佢話計埋其他使費，預計每個月開支要成千萬元！佢解釋，邊境購物城將會向銀行借貸約一億二千萬元，分二十四期還款，每期還五百多萬元，其餘四百多萬元就係日常營運開支。
象哥話可能因為最近有鉛水、天津爆炸、曼谷炸彈爆炸等新聞，令到邊境購物城到目前為止都冇乜太大嘅反對聲音，希望九月喺城規會順順利利，一日就通過。不過，佢話依家個計劃未過城規會，所有嘢都唔敢正式簽約，費事一個唔覺意拖得太耐就唔好喎。咁多波折，如果最後搞得成，象哥真係要劏雞還神嘞！
