兩個問責局長喺上個月被免職，有傳商務及經濟發展局局長Greg蘇錦樑因為免費電視發牌風波同香港電台問題，原本都喺呢份炒魷名單之上，但因為搵唔到合適接班人選，先避過被炒魷一劫。阿Greg唔知係咪想補鑊，展示自己嘅存在價值，最近就頻頻曝光，尋日仲無啦啦搞咗個傳媒茶敍，美食車、電視發牌、至近日嘅熱話Uber召車服務等問題都有問必答。阿Greg咁積極，唔通真係驚被炒魷？

訪美國睇美食車

阿Greg尋日喺政府總部搞傳媒茶敍，政治助理陳百里、兩位常任秘書長何淑兒同容偉雄都有份做左右護法，但就唔見副局長梁敬國。阿Greg話最近經常要外訪，難得呢幾日留喺香港，就即興約記者朋友見面，咁啱梁敬國放假，惟有飛甩佢喎。

其實阿Greg近期已經常喺社交網站「蒲頭」，一時就發貼加拍埋短片講自己去天文台參觀，一時又上載喺澳洲睇美食車嘅相片。講起美食車，佢又不改寸嘴性格，話說佢聽日外訪智利同墨西哥，之後會順路去埋美國三藩市睇美食車。對於立法會議員日前取消三藩市美食車考察團，佢就笑笑口話︰「反而我去到喎！」對於美食車計劃被人話只聞樓梯響，佢話已有初步構思，好快就會搵議員討論。

早前當局轄下嘅投資推廣署疑似甩轆，五月時喺網頁上以「成功個案」推介Uber召車服務，但點知警方高調拉人，搞到署方急急刪除有關網頁。阿Greg就話其實署方每次都有同外商講解本港情況同相關法律，但始終人哋公司嘅事就只得人哋公司先知。被問到係咪依家有關嘅法例過時，要修改法例，佢就拋番個波畀運輸及房屋局局長張炳良，話等張炳良答喎。佢呢份工真好做，得閒去考察遊吓埠，有事就「唔關我事」推莊，所以被列入炒魷之列，一啲都唔出奇囉！

第一手消息請下載on.cc東網iPhone/iPad/Android/Windows Phone Apps