城中鏡：遊泰心掛掛
泰國曼谷日前發生大爆炸慘劇，部分已訂晒機票同酒店嘅人，為安全計都立即更改行程，轉機票去其他地方。尋日喺一個酒會上，見到中華總商會常務會董Johnny楊華勇同太太莊菲娜，原來佢哋月底本來打算去布吉玩，但依家就十五十六，唔知去唔去好。
楊華勇（右）同太太莊菲娜月底會去布吉旅行。
陳家偉（右）開新店，太太Canace連思瑤全力支持。
顏明秀（右）去完菲律賓潛水，而王詩雅就去完澳洲返港。
顏明秀遊菲 親睹巨海龜
尋日美國家得路天然健康食品喺銅鑼灣有新店開張，與執行董事及總裁Calvin陳家偉老友鬼鬼嘅Johnny兩公婆去捧場，講起早幾日曼谷爆炸慘劇，Johnny話目前心大心細，皆因去布吉嘅所有嘢已一早訂好晒，取消又唔係，但照去嘅話，唔多唔少都會有啲擔心，雖然布吉同曼谷始終有一段距離，但都盡量避免前往人口密集嘅景點。
現身捧場嘅仲有Calvin喺香港中華廠商聯合會嘅一班手足，包括青委主席張永鴻、副主席吳景灝、顏明秀、劉子芸、黃浩鈞同王詩雅等。提到健康生活習慣，除咗飲食，配合運動亦好緊要。啱啱去完菲律賓旅行返港嘅顏明秀，就最鍾意做運動，話今次喺當地潛水有意外收穫，就係見到成個人咁大隻嘅海龜，對於有養龜嘅佢嚟講係格外驚喜，仲拍低咗唔少相片及短片添！
對於近期零售業正處於寒冬，唔少大型連鎖店都要開源節流，減少分店，Calvin反而逆市開分店，佢話係因為其客源大部分係香港人，所以個人遊遊客減少咗，對於生意影響不大，加上租金回落，佢哋多咗地點選擇，嚟緊一年預計會繼續擴張。
