話說早前大埔區議會新富區補選是佔領行動及政改方案否決後嘅首場選戰，喺建制派兩名候選人互相爭位分票下，令泛民主派工黨秘書長郭永健順利當選。建制派當日星級人馬盡出，但獲建制派力撐嘅「阿包」何萬傑，得票都只係僅僅多過原區議員羅舜泉嘅仔羅曉楓百幾票，令建制陣營大為震怒，歸咎阿包係公子哥兒，唔着緊選情，打算喺十一月區議會選舉換人參選，望收復失地。
有傳建制派打算將原廣福區議員林泉調去新富選區，一來係泛民喺廣福選區都未有動靜，經過評估後，認為可以派新人落區接替林泉嘅議席。而林泉喺鄉事派都略有影響力，有望爭取錦石新村一帶嘅選票。對林泉而言，其實佢已屆退休之齡，選到就做多四年，落選亦冇所謂。
咁啱尋日大埔區議會討論一億元社區重點項目，郭永健指林村改善工程計劃同之前通過嘅計劃有出入，建議「不如掟走佢啦」，但係林泉就有好大反應：「掟走你郭永健啦！」未知係咪說漏了嘴，暗示要踢走郭永健。
如果十一月區選，建制派林泉同泛民郭永健單打，林泉勝算較高，但仍存好大變數。有傳羅曉楓屢敗屢戰，正考慮參選，近月積極落區工作。咁樣睇嚟，建制派好大機會再次協調失敗，莫非要操盤人出手，先可以防止之前補選內訌嘅情況再發生？
第一手消息請下載on.cc東網
