施衛民
喺中環打老虎打到出晒名嘅證監會法規執行部董事施衛民，下月就離開證監，過檔英國金融操守局（FCA）。邊個接佢班？咪心急，證監會依家仲搵緊。
事關呢個位真係唔易搵人，打虎得罪人多唔在講，仲要呢方面嘅叻人實在少，數數手指，香港得幾個，大部分都係洋人，主要係幾間大律師行專做證券訴訟、糾紛排解同監管嘅阿頭。
嗰班阿頭級年薪閒閒哋最少一球（即一百萬）美元，施衛民個位，舊年人工得六百幾萬元，去證監做好大可能要減人工！再講，呢行圈子實在細，律師行依家服侍開嘅客，分分鐘係證監「敵人」。去咗證監做嘢，隨時綁手綁腳，所以你話幾難搵人呢！
咁證監大可向海外監管機構或者大銀行嘅法律顧問挖角？都係嗰句，做得叻嘅唔係好多。
講番施衛民，好多人話佢過檔英倫係因為「親密戰友」FCA阿頭韋奕禮嘅關係，如今馬田（韋個洋名）被迫下台，英國財相歐思邦又話FCA「要步入新階段」，暗示監管方向可能由嚴變鬆，咁施衛民去到英國仲可唔可以發揮佢「打虎」嘅所長？
第一手消息請下載on.cc東網
