數碼通總裁黎大鈞今個月底就正式同公司講byebye，佢呢個數碼通「開山祖師」話決定走，係因為自己呢個年紀，係時間要幫自己打算一下。

邊個係接任人？黎大鈞話留番畀董事會安排。

黎大鈞今年六十一歲，絕對仲有心有力，佢之前亦出入過數碼通一次，今次又會唔會……出名直率嘅佢話「走就係走，放手就放晒，我唔會考慮轉做非執董，現時亦無計劃去郭生（郭炳聯）其他公司度做」，答得幾咁斬釘截鐵，冇拖泥帶水，絕對黎大鈞風格。

九二年時，佢以首任總裁身份，帶住數碼通打入2G市場，到○一年再重返公司發展3G同4G，完全見證住香港通訊行業嘅時代變遷，「寸嘴」梗係寸得起。

數碼通早排推出移動電商應用KISS，為公司部署轉型，可以話係黎大鈞離別前嘅最後代表作。到底會由邊位接掌？佢話留番畀董事會安排。咁口密！

第一手消息請下載on.cc東網iPhone/iPad/Android/Windows Phone Apps