政壇：葵青區會豪花63萬開fb
依家搞政治，唔係落區見吓街坊咁簡單，仲要學識利用網上平台同青年人打交道。好似葵青區議會，就用咗社區重點項目計劃一億元撥款中嘅六十三萬元，用嚟製作社交網站facebook（fb）專頁宣傳。不過，大灑金錢製作嘅專頁，竟然只係得萬多個嘅「讚好」，據聞大部分「讚好」唔係嚟自香港，令人質疑唔係物有所值。
葵青區議會豪花六十三萬元製作facebook專頁宣傳。（互聯網圖片）
葵青區議會計劃用政府提供嘅一億元撥款搞「攜建共融健康社區」計劃，提供牙科、眼科等社區健康服務，仲會幫合資格嘅長者申請資助睇牙科、配眼鏡。本來為居民提供服務係好事，但係區議會竟然用咗其中二百萬元作為宣傳費用，當中有六十三萬元更加只係用作開設「攜青」fb專頁。
當區議員林立志就力斥二百萬元宣傳唔合理，因為今次計劃服務對象主要係長者，好多長者根本唔會上網，不如減宣傳開支，增加服務名額，令更多長者受惠。
