政壇：搞搞政：老虎仔引退 難搵接班人
民協多年嚟面對青黃不接、未能打破立法會內一人黨嘅宿命。面對年底區議會選舉，民協除咗要保住議席外，亦要考慮立會部署，仲有最重要嘅黨內傳承問題。據了解，現任主席「老虎仔」廖成利年底將會退任，但繼任人揀無可揀，除咗較資深嘅副主席譚國僑同任國棟外，就只有「嫩筍」秘書長楊振宇。
民協喺○七年嘅區議會選舉失利，出任主席成十八年嘅立會議員馮檢基要引咎辭職，老虎仔臨危受命接棒，至今已做咗八年主席。據聞民協亦曾有意安排老虎仔出選油尖旺新選區尖東同京士柏，但佢最後婉拒咗，似乎真係有意裸退。
區選勝出為入場券
而主席接班人選，根據慣例會由兩名副主席中提拔，即係譚國僑或任國棟二揀一。但據聞民協內部曾討論過應否培育新人接棒，並配合明年立會選舉，所以主席人選最好喺選舉之後產生，如果成事，主席人選必須喺區選中勝出，先有機會爭奪主席一職。楊振宇係三位主席人選之中最年輕，亦係黨內栽培人選之一，如果真係要培育新人，佢必定係首選。
至於九龍城區議員任國棟，近年主打紅磡區骨灰龕議題，要連任亦問題不大，只係佢喺政治圈中並非太活躍，如果要擔大旗，相信要再下苦功。三人之中，最老資格係譚國僑，佢繼一一年區選不敵西九新動力、原國家女子足球隊員韋海英，一二年立會選舉又未能保住民協嘅九龍西直選議席，令其政途暗淡。據了解，佢打算再接再厲，喺年底區選再挑戰韋海英，但睇嚟佢要想辦法贏到對手，先攞到主席爭奪戰「入場券」。
