政壇：立會議員老餅化
好多政黨都有老化嘅迹象，所以銳意要年輕化，連立法會都有老化嘅趨勢，點解咁講？根據立會嘅統計資料，議員嘅平均年齡拉高咗，達到五十八歲，鄉議局功能組別嘅議員劉皇發就以七十九歲之齡成為最年長議員，最年輕議員分別係工聯會勞工界議員鄧家彪同建仔漁農界議員「高佬賢」何俊賢。
陽盛陰衰 12人為博士
幾年前做嘅統計，同今次最新做嘅統計變化不大，發叔依然係最年長嘅議員，而鄧家彪同高佬賢亦係最年輕嘅議員，而上屆最年輕議員就係陳克勤。不過，隨住呢幾年嘅年歲增長，令議員嘅平均年齡亦相對拉高，截至七月底為止，議員嘅平均年齡為五十八歲。此外，今屆嘅全職議員都比上屆多咗九位，睇嚟各位議員都花多咗時間去處理立法會事務喎。
喺二○一一年政改方案通過後，立會增加咗十個議席，地區直選同功能組別各增加五個議席。雖然議席增加，但立會「陽盛陰衰」狀況無變，事關女性議員數目同上屆一樣無增加到，都係得十一位，而男性議員就多咗成十位，佔咗八成四議席。
全職議員之外，今次統計議員嘅職業，除咗會計師、銀行家、工程師、行政人員、測量師、證券交易商等，仲多咗個報稱「政治學院主席」。而今屆議員比上屆更加高學歷，有六十五位議員有大專或以上學歷，更有十二位有博士學位。另外，第一次擔任立會議員嘅人數仲比上屆多咗十一位；同時擔任行政會議成員嘅就有三位，比上屆多咗一位。
經歷舊年嘅佔領行動之後，好多後生仔都組成咗傘兵組織，例如「青年新政」。下屆立法會選舉會喺出年舉行，唔知班後生仔又會唔會蠢蠢欲動玩埋一份，乘機拉低番立會議員嘅平均年齡同埋平衡番男女議員嘅比例呢？
