城中鏡：辛酸昔日情
時下興懷舊，康文署古物古蹟辦事處日前就搞咗個「從線到衫」嘅專題座談，紡織及製衣界立法會議員鍾國斌（Felix）、著名設計師鄧達智都有出席，講吓舊香港嘅辛酸事，而「中電孖寶」企業發展總裁莊偉茵（Quince）同總裁潘偉賢，仲特登一身懷舊時裝話當年添！
莊偉茵（右）同潘偉賢一身懷舊時裝話當年。
莊偉茵細個在啟德附近唐樓長大。
鄧達智帶埋年輕學生合照同大家分享往事。
鄧達智
着住七十年代打扮嘅Quince話，佢喺啟德附近長大，細個每日睇住飛機低飛都好擔心啲飛機會唔會跌落嚟。佢係話當年住七層高嘅大廈，冇升降機，擔水就一定要行樓梯上樓，當年仲成日停電添，所以每家都必備蠟燭。潘偉賢講起用電，話以前有分粗電同幼電，收費相差三成，唔少人為咗慳錢，都會冒險改裝電路，仲搞到有好多事故。
潘偉賢仲話喺漁村年代，香港有好多間電力公司，就連大嶼山同長洲等離島地區，都各自有公司供電，不過成本就好高喇，加上當年用高污染嘅燃料產電，後來中電收購咗之後，成本就平番啲。講開又講，潘偉賢太太都係長洲人，於是被人笑佢係「收購」太太返嚟嘅！
鄧達智嘆人情味減退
Felix就話，以前香港住喺木屋區同板間房都係常見嘅事，煮嘢食會用火水爐，制水時又成日大叫「樓下閂水喉」，連佢自己都住過板間房，覺得時下年輕人非常幸福。
鄧達智就話，香港上一代好多都係從事工業，例如爸爸做裁縫，媽媽就做女工，但多數唔想仔女行番自己條辛苦路，加上教育制度改善咗，年輕人學識多咗，令到入行人數大減，令香港工業冇咗生命力。佢又話，香港以前人情味重啲，打工仔冇話計較要超時工作，但依家就唔係咁喇。
