政壇：搞搞政：一舊雲變步驚雲 朽木不可雕
啟晴邨嘅鉛水風波愈搞愈大鑊，最先揭發呢件事嘅民主黨（白鴿黨）立法會議員黃碧雲（一舊雲）飲咗「頭啖湯」，大有領先對手之勢，有人笑言「一舊雲」終於升呢為「步驚雲」喇，不過，近日一舊雲亂咁噏又出事，被指改變唔到「暈吓暈吓」嘅作風，尋日連特首都要揶揄兩句添，一舊雲呢次真係唔爭氣囉。
設計圖片及對白
一舊雲早幾日自恃揭發事件好叻，沖昏頭腦咁喺報章撰文，佢批評政府獨立調查委員會獨立性不足，質疑特首會干預調查委員會嘅運作，搞到政府前日急急出稿反駁兼澄清，而特首梁振英尋日亦都特登回應一舊雲話：「聽到之後有啲暈暈哋」，又指一舊雲嘅說法對調查委員會主席同委員都唔公道，仲話講呢番說話嘅人唔認識法例同規定添，擺明寸爆一舊雲無常識啦！
一舊雲唔單止經常對外失言，對內亦有白鴿黨員質疑佢能力不足，近日同新民主同盟等其他泛民成立反鉛水大聯盟，就被指將辛苦建立嘅優勢同其他黨派分享，令黨內對佢有啲微言。
事實上，白鴿黨多次想捧佢上位，佢都甩轆收場，失言已經事小，喺議會又投票撳錯掣，連白鴿想捧佢做主席都要暫時擱置，朽木不可雕，睇嚟又一新證！
