政壇：梁高美懿時刻監察運動量

智能手帶功能多多，已成唔少健康一族嘅潮品，創興銀行副主席兼董事總經理梁高美懿（梁太）早前收到乖女送嘅智能手帶，佢即刻戴上手，日前仲戴住亮相業績會添，雖然手帶同佢嘅風格有少少出入，但佢好鍾意用佢嚟監察自己一日究竟行咗幾多步喎。

唔講唔知，梁太話業績發布會當日佢行咗八千步，全日喺創銀大廈入面，即使由中環港鐵站D2出口去創銀大廈二十八樓，最多都係一百二十米，畀盡來回都係得四百步喎，點解有咁多呢？梁太話，佢平時兩層樓以內都會揀行樓梯，而業績發布會嗰日，佢更加要騰上騰落開股東會同董事會，夜晚仲要陪個孫玩，騰完一輪已經夠晒運動量。