政壇：趙式芝為電騙多次報警
電話騙案愈來愈猖獗，被譽為國寶級「二胡大師」王國潼早前被恐嚇詐騙電話，騙去約二千萬元，轟動全城，唔講唔知，名媛趙式芝都話佢創立嘅「相信愛慈善基金」，遇過一啲騙案，不但有人冒充佢哋嘅名，騙好心人捐款；三年來仲一直受詐騙電話行騙，為咗咁，佢曾經多次報警備案。
趙式芝（左）創辦基金會幫助有需要嘅人，但原來基金會都遇過唔少騙案陷阱。
趙式芝講起啲騙案都好無奈，佢話電話來源地好多，有大陸、印度等，而且手法層出不窮，由於曾經有捐款者受騙，所以佢都特別敏感，至今幸好未上當，不過，就為咗呢類電話詐騙事件，多次報警備案，可惜最終不了了之。佢坦言呢類騙案要緝拿騙徒難度好高，但為免更多人受騙，都只能希望當局更關注事件，同埋加強宣傳教育，佢話基金會網站都有寫明有人冒充，叫大家小心。
講完電話騙案，趙式芝話佢嘅社交網站facebook都經常被冒充，所以佢會不時在facebook搜尋有關自己嘅資料，一有假冒會即時舉報。
