大埔：僭建大招牌 遇風隨時冧
「僭建都唔知佢穩唔穩陣，仲要裝埋啲大招牌，萬一個招牌跌落嚟分分鐘拉埋個僭建屋頂一齊跌，到時就死得人多！」黃女士指大埔廣福道有大廈平台僭建，而僭建物竟附有兩個大型招牌，擔心雨季期間遇上颱風來襲，僭建物及招牌隨時不敵狂風，「僭建咗咁耐都冇人做過嘢，政府又話打擊僭建，係咪淨係得個講？」
大埔廣福道有大廈平台僭建，並有違例招牌。
屋宇署發言人證實，上址平台有僭建物，已向有關業主發出警告通知，並將警告送交土地註冊處，註冊在有關物業業權紀錄上，至業主清拆違建物後方會註銷。發言人又指，上址有數個違例招牌，但招牌無明顯危險，據現行政策，有關招牌屬須予以取締類別，該署會按序向有關招牌擁有人發出清拆命令，並已發信敦促其盡快自行安排清拆工程。
