城中鏡：鋼琴友緣
其實玩音樂唔一定要喺正式演奏廳，ＰＭＱ元創方近日將著名英國藝術家Luke Jerram發起嘅國際街頭鋼琴藝術活動引入香港，喺多個地點如街市、公園同圍村等擺放鋼琴供途人任彈。尋日開幕活動上見到「海港城鋼琴王子」Phoebus陳雋騫，佢同現場兩位鋼琴家Warren李偉安及Amy施敏倫係聖保羅男女中學及附屬小學嘅同學仔，自細就合作無間。
李偉安（左起）、施敏倫同陳雋騫自小就合作無間。
李明哲（左）為策劃今次活動出心出力，右為黃寶兒。
譚允芝（中）不時拍住兒子（右）同女兒喺家中合奏。
十六位來自不同界別嘅本地鋼琴好手，尋日難得匯聚一堂喺PMQ表演「十六重奏」，為活動揭開序幕。Phoebus笑言當年喺小學歌詠團負責彈琴，點知彈唔掂，要急召師兄Warren幫手。當年佢哋喺歌詠團練歌練到悶，仲搵埋Amy一齊jam歌，相當有默契。
有份設計呢啲鋼琴嘅著名時裝設計師鄧達智同住好啲創辦人楊志超尋日亦有出席。鄧達智話音樂對時裝影響好大，佢又話曾有同事送咗隻CD畀佢，佢覺得好好聽，於是由下午三點一直喺公司重播又重播，聽到夜晚十一點幾先肯走。
譚允芝喜在家jam歌
同場表演嘅仲有鋼琴家李嘉齡、李明哲、大律師公會主席譚允芝、西九管理局行政總裁辦公室總監黃寶兒及中策組特別顧問高靜芝嘅女兒盧宜均等。經常於正式場合表演嘅李嘉齡係首次喺街頭彈琴，感覺別有一番風味。
黃寶兒則透露，父母當年覺得音樂搵唔到食，所以做咗其他行業。而女兒同兒子分別拉小提琴同大提琴的譚允芝，就不時同家人及朋友在家合奏jam歌。
