政壇：內企高管 上市前猛特訓
內企高管為咗嚟香港上市體體面面，唔少人事前都會「地獄式」特訓，苦功分分鐘多過啲選美佳麗。專幫新股上市嘅博達浩華創辦人兼總裁James張力仁話，除咗應對技巧外，連面部表情、甚至交換卡片同食西餐禮儀，公關都會執。
博達浩華張力仁爆，特訓包埋Q&A綵排，兼搵投行嚟做觀眾添！
James話香港媒體眼利，問嘢又尖銳，內地高管未必慣，所以會提啲高管，就算聽到乜都千祈咪「變臉」，保持微笑，多啲講「多謝你嘅問題」、「以下由某某回答你嘅問題」咁。佢哋出嚟見人前，會排練Q&A，問題少則50條，多則冇百幾條都落唔到樓，仲會有大型綵排，投行嚟埋做觀眾添！
而通常出事位就係未來嘅財務數字。James話試過有個黃金交易公司客，一個唔小心同傳媒講咗未來金價預測，好彩公關出手搞番掂。
