政壇：搞搞政：狂谷地區議題吸票 泛民建制隨時炒燶

泛民政黨方面，白鴿黨首先踢爆食水含鉛超標事件，對此如拾至寶，其後更擴大戰線，聯同民協、新民主同盟等組成「食水苦主大聯盟」，似乎想一直將此議題延燒至十一月區選，而該黨個別區議員同成員則對地區議題各有關注。例如該黨嘅總幹事林卓廷主打樓宇維修圍標，中西區區議員許智峯亦咬緊半山般咸道四棵石牆樹被斬。

由黨魁「袋巾傑」梁家傑領導嘅公文袋，則同教育界議員葉建源對準港大副校長任命風波，似乎一日副校長任命未有明確取態都唔放手，之不過基於以上多個議題都具爭議性且較複雜，支持同反對意見都有，因此未必會好似鉛水危機咁，短時間內就取得選民嘅支持認同。

有泛民中人事前張揚，手上有數個個案隨時可以「炒熱」，暗示於選舉前隨時可以斬多幾両，據聞泛民於成立十八區飯盒會嘅基礎上，打算成立專門嘅「心戰室」，分析並考慮選舉策略，包括製作地區施政願景政綱，似乎想同建制派長期作戰。

話雖如此，建制派都唔係省油的燈，建仔近日先喺地區跟進衞生清潔等議題，到最新涉及中港關注嘅電話騙案議題，就由立法會議員陳恒鑌領軍跟進，希望在此殺出一條血路；工聯會方面則主力默默做好地區工作，好似搞無障礙通道、開居民大會講解公屋重建及綠置居等議題。

有建制派中人分析，區議會選舉嘅勝負關鍵可能係候選人跟進當區選民關注嘅議題力度，多於關乎全港性嘅食水含鉛超標、電話騙案等議題，所以各大政黨狂谷議題嘅同時，如果忽略細微細眼嘅民生無小事課題，分分鐘會得不償失都唔定。