政壇：「飯碗舞」搶閘戰區選
喺○七年參加立法會香港島補選，以跳「飯碗舞」一鳴驚人嘅蕭思江復出，尋日搶閘宣布參選十一月灣仔區議會樂活選區，底因係同該區巴士改組後，其中一條巴士路線嘅服務時間同終點站有關，佢又批評，前任同現任樂活選區區議員，喺巴士改組問題「唔覺得做過任何嘢」，相反自己多次就呢件事去信巴士公司跟進問題。唔知第時宣傳競選時，蕭思江會唔會以巴士為背景，再跳「飯碗舞」嚟爭取街坊支持呢？
報稱居於樂活選區嘅蕭思江話，一直關心區內巴士改組同路線問題，又自爆原本打算向法庭申請命令，要求巴士公司將代替巴士路線嘅終點站，同過往嘅巴士路線睇齊。不過，佢最近決定參選灣仔區議會樂活選區，為免令選舉經費超支，因此暫緩有關法庭程序，佢有信心可以攞到足夠嘅提名，正式報名參選。
料惡鬥社民連麥國風
蕭思江尋日宣布參選，距離正式投票日有三個月，相信係最早要計算選舉經費嘅「候選人」。資料顯示，現任樂活選區當區區議員為白韻琹，同一選區前任區議員為社民連麥國風，據悉麥國風亦有意捲土重來，希望重奪樂活選區議席，因此預料會有一場惡鬥。
除咗參加十一月嘅區議會選舉，蕭思江過去仲試過參加立法會選舉，當問及會唔會參選明年初舉行嘅立法會新界東地方直選補選，身為港人民權民生黨主席嘅蕭思江表明無意參選，原因係兩大陣營已經拎晒啲票，佢自言費事參選「被侮辱」喎。
