城中鏡：下廚得食
尋日喺美食博覽見到香港優質標誌局（簡稱Q嘜）主席丁煒章，非常鍾意食嘢嘅佢笑言自己識食唔識煮，唯獨是對煎牛扒特別有心得，皆因佢係一個不折不扣嘅「牛魔王」。佢解釋，自己細個本來都唔係特別鍾意下廚，但中學時喺海外留學，對食物有要求嘅佢，食唔慣當地食物，就忍唔住開始親自下廚，煎自己最愛嘅牛扒喇！
左起：孫榮聰、爺爺孫建超同爸爸孫啟烈，三代同堂齊撐美食博覽。
丁煒章留學外國時食唔慣當地食物，於是學會親自煎牛扒。
鍾志平（左）同吳宏斌都係海鮮愛好者，後者尤其鍾意食蟹。
一班擔任Q嘜美食「小煮播」嘅小朋友比併廚藝。
香港優質標誌局尋日喺會展美食博覽展場內，舉辦「2015Q嘜美食寶寶選舉」，主席丁煒章、Q嘜委員Eric孫榮聰同弟弟孫榮良、委員吳宏斌、名譽會長孫啟烈同鍾志平等均有出席，為一班擔任Q嘜美食「小煮播」嘅小朋友評分。
吳宏斌鍾志平喜好海鮮
吳宏斌同鍾志平都係超級鍾意食海鮮嘅人，鍾志平早前仲去咗日本大擦新鮮水產，笑言自己已經一把年紀，唔怕輻射，所以可以盡情咁食。至於吳宏斌就至愛食蟹，佢話知道自己食多咗嘢嗰期，就會做番多啲運動，例如打網球同高爾夫球消耗番。雖然佢唔識煮餸，但做珠寶行業嘅佢，對食物嘅賣相、伴碟擺相等都特別講究。
至於Eric爸爸孫啟烈就坦言，最好食嘅嘢通常都最唔健康，所以佢會每日沖靈芝沖劑嚟飲，唔知係咪因為咁，每次做親身體檢查時，雖然BMI超標，但仍然冇咩特別病痛，連醫生都「吹佢唔漲」咁話。巧合地與爸爸一同着咗套格仔衫父子裝嘅Eric，睇落就清瘦咗唔少，雖然家中有孫榮良呢個識煮嘢食嘅細佬，令佢可以大飽口福，但近年佢都好留意自己體重，好似M9等牛扒脂肪太多，一世人食一、兩次都夠晒，平日食啲普普通通嘅就夠喇！依家佢每星期會做兩次健身，每次做兩小時，要保持健康身形喎。
