政壇：鬍鬚曾網誌 亂噏扮高深

講緊係鬍鬚曾尋日又做「鍵盤戰士」，喺每周網誌中搞爛gag，形容自己每逢暑假都喺罪咎感下推出「紓困措施」，努力刨下家裏積落嘅書。之後佢又引用美國知名神學家兼政治哲學家Reinhold Niebuhr嘅名言，強調做人最緊要有智慧分辨「能與不能」，對於自己有能力去改變嘅事，就應敢於去做，對於冇能力改變嘅事，就要勇於接受，否則我哋就會坐失良機，又或者枉費心機；好似好有道理咁，但又唔知佢實際講緊乜。最後佢仲筆鋒一轉，無喇喇講到「一帶一路」同香港嘅科技產業發展，搞到啲花生友斷晒片。