喺政改表決大「甩轆」後，政界一度盛傳立法會總商會代表林健鋒須為事件問責，議席隨時不保，其中一個傳聞挑戰者，就係現任總商會理事、裕華國貨董事總經理余鵬春，另有傳富貴黨亦有意派人收服總商會呢塊失地。不過，其後又有消息話，中央已就「甩轆」事件重新定性，認為當時拒絕跟大隊離場嘅富貴黨先係「甩轆」罪人，林健鋒爭取連任，應該問題不大。我哋尋日喺一個活動上撞到余鵬春，問到佢林健鋒連任立法會，佢就語帶曖昧咁話，「暫時嚟講」大家都係支持林健鋒，其他嘅嘢就遲啲再講。唔知佢係咪仲等緊機會呢？

林健鋒

余鵬春（圖）話「暫時嚟講」，大家都係支持林健鋒做立法會總商會代表。（資料圖片）

講到天津大爆炸，余鵬春話事件對佢公司嘅貨源影響不大，因為佢哋嘅進口內地食品主要嚟自南方，服裝就嚟自華東，來自北方嘅貨源較少，亦唔一定要經天津港運嚟香港。佢又話依家唔係盛產天津鴨梨嘅季節，至於當地水源會否受污染，繼而影響鴨梨等特產，佢就話自己唔係專家，但強調本港監察進口食品安全做得唔錯，消費者暫時可以放心。冇錯，又係講緊「暫時」。

第一手消息請下載on.cc東網iPhone/iPad/Android/Windows Phone Apps