政壇：工廈空置減 波波叫停「活化」
上個禮拜規劃署公布《2014年全港工業用地分區研究報告》，指工廈空置率有下降趨勢，認為各行業日後對工廈需求大。發展局局長「波波」陳茂波順勢叫停活化工廈計劃，話自一○年起實施嘅活化工廈措施，已批出一百一十二宗申請，認為已達到善用工業用地樓面、促進市區舊工廠區轉型嘅目標，唔再為活化措施延期，即一六年三月底後唔再接受特別豁免書同契約修訂的申請。
波波尋日就喺網誌話舊工廠區工廈整體空置率為百分之五點三，愈嚟愈多嘅經濟活動同新興行業選擇使用工廈空間，例如陳列室、數據中心、文化創意藝術工作室、水耕或水產養殖等。
政府喺一○年四月起推出活化工廈措施，截至今年七月底，地政總署共接獲一百六十一宗此措施下重建或整幢改裝工廈嘅申請，其中一百一十二宗已獲批准。獲批出嘅整幢改裝申請中，大部分位於觀塘及葵涌，新用途主要包括辦公室、食肆、零售同服務行業，以及酒店；批出嘅重建申請多位於觀塘、油塘、長沙灣、葵涌及黃竹坑，重建後作住宅、商業或酒店之用。
波波又話工廈整體空置率已見下降，工廠區陸續穩步轉型，活化工廈措施已達善用工業用地樓面、促進市區舊工廠區轉型嘅目標，認為應讓工廈嘅改裝同重建回歸市場主導，唔再為活化措施延期。
