政壇：搞搞政：高級醫生緊張額外加薪
公務員事務局每六年進行一次薪酬水平調查，確定公務員薪酬係咪同私營機構薪酬大致相若。最新一次為二○一三年薪酬水平調查，特首會同行政會議今年二月拍板，決定一批月薪九萬多元或以上嘅高級公務員獲額外加薪百分之三，立法會財務委員會亦於暑假休會前通過，基於今次額外加薪可以追溯至去年十月，一批高級醫生見到醫管局冇聲氣，都好鬼肉緊諗計仔，一來希望引起業界關注發聲，二來亦希望醫管局正式表態，等大家安心。
三發公開信 籲「K先生」關注
其中走得最前嘅係香港公共醫療醫生協會（PDA），一早喺自己網頁搞咗個名為「3%」嘅專頁，向大家跟進並匯報最新進展，其中上周一更有一篇內含醫學術語嘅「新聞」報道，由會長陳沛然化名為「陳配鹽報道」，一時又引述話「3%」於醫生手機爆發異於尋常，「出現於醫生群組爆發及有效地人傳人」，其後又稱「3%」嘅應變級別，由戒備提升至嚴重。
最引人入勝嘅部分，係參照女歌手薛凱琪早年熱爆嘅歌曲《奇洛李維斯回信》呢首歌曲二次創作，提到工會早於今年三月起，三次發出公開信予各高層包括「K先生」關注事件，呢個「K先生」明顯就係食物及衞生局局長高永文，公開信表明「K先生可否阻你十八秒鐘看看信」，如果認同機制需要跟隨，可以有回信等，認真係花臣多，高級醫生為咗額外加薪，真係去得好盡，講到底都係想醫管局有正面回覆。
據聞好快就有新進展，醫管局回覆話就公務員薪酬水平調查報告，會審慎考慮對醫管局僱員嘅薪酬做類似調整，計劃下月中將建議提交人力資源委員會討論。有咗討論額外加薪嘅會議時間表係成功嘅一半，但最緊要都係付諸實行，PDA於開會前，有否新一波行動爭取額外加薪，答案似乎不言而喻嘞！
