政壇：郭偉強傳撐大舅接班

姚國威本身係郭偉強太太嘅哥哥，亦同下屆勞工界議席熱門接班人之一、另一元朗區議員陸頌雄有師徒情分。知情人士透露，郭偉強本身同姚國威係多年好友，加上姻親關係，所以有私心想將議席讓畀大舅。不過，郭偉強下屆要由勞工界轉戰直選，難聽啲講句，佢都自身難保，如果仲想傳位畀大舅，似乎有啲吃力。

姚國威陸頌雄 師徒交鋒

我哋問過郭偉強點睇呢件事，佢直指呢個傳聞好搞笑，強調邊個接棒並非由佢話事，首先要得到工聯會支持，然後再向各大工會推薦。不過，佢同時大讚大舅喺地區上好勤力，亦有參與工會事務。至於姚國威本人，我哋就暫時搵唔到佢回應。

如果姚國威真係有意爭奪勞工界議席，無可避免要同師傅陸頌雄正面交鋒，甚至決裂。知情人士稱，兩師徒關係早已大不如前，喺區議會會議上不時擦出火花，原因係大家理念不同，陸頌雄覺得區議員應以街坊為先，但據聞姚國威就有唔同睇法。

空穴來風，未必無因，早前元朗區議會交通事務委員會流會一事，就可看出一點端倪，當日姚國威因不滿身為委員會主席嘅陸頌雄未有妥善安排午膳時間，要求點算會議法定人數，最終引發流會，亦有傳兩人開會好少交流，不咬弦的傳聞未必無根據。