政壇：貪曾鬼祟現身快閃避鏡頭
「貪曾」前特首曾蔭權爵士連串貪腐醜聞纏身，被廉政公署調查超過三年，近日刑事檢控專員楊家雄公開表明對貪曾案即將有決定。雖然貪曾即將落鑊，但竟然仲唔知醜、周圍走，除咗下月初會去北京睇閱兵外，尋日又去咗尖沙咀文化中心睇芭蕾舞表演，驚死人哋唔記得佢就嚟落鑊咁。不過，貪曾見到在場咁多記者即時表現得鬼鬼祟祟，唔肯停低不特止，仲要急急轉身從後門入場，完場亦由特別通道離開。
「貪曾」曾蔭權同太太曾鮑笑薇尋晚鬼祟去文化中心睇芭蕾舞表演。
貪曾尋晚七點鐘左右，同太太曾鮑笑薇喺G4保鏢陪同下去尖沙咀文化中心，睇王仁曼芭蕾舞學校嘅芭蕾舞表演。早前着到成個阿伯咁去行超市嘅貪曾，雖然尋晚以正裝現身，但就好似唔見得人咁，事關在場記者一見到貪曾夫婦，叫佢哋停低影張相，點知貪曾唔肯影不特止，仲粒聲唔出，一轉身就同太太喺散場出口竄入會場，全程都用背脊對住記者。聽聞貪曾今次出席係因為孫女有份表演，所以自掏腰包買飛入場，亦冇靚位坐，都唔出奇嘅，依家風頭火勢，都係穩陣啲好。
