台灣洪瑞珍三文治早前喺香港搞出逾百人中毒嘅事件，搞到唔少人對台灣糕點深懷戒心，台灣「糕餅之鄉」台中咁啱有個團來香港宣傳，市政府秘書長黃景茂今次孭重飛，佢話台中好多糕餅老店出品由產地到銷售係一條龍作業，減少咗運送期間嘅污染風險，所以遊客可以安心選購。

黃景茂（右二）、李逸安（右一）及台中市觀光旅遊局局長陳盛山現身宣傳騷。

而洪瑞珍總店喺彰化縣，該縣政府城市暨觀光發展處處長田飛鵬亦有到場，佢就話，事件未對當地旅遊造成太大影響，而且當地有好多美食及旅遊景點，日後將多啲同毗鄰嘅台中一齊嚟搞宣傳喎！

最近唔少港人到台灣買樓移民，氣候接近香港嘅台中亦係港人置業嘅熱點之一，唔少豪宅呎價都只係三、四千元港幣。台中市經濟發展局副局長李逸安話，台中嘅樓價平過台北，台北樓價又平過香港，所以有優勢吸引包括香港人嘅外來移民。

第一手消息請下載on.cc東網iPhone/iPad/Android/Windows Phone Apps