政壇：搞搞政：維港渡海泳 議員齊甩底
維港渡海泳十月中舉行，個活動每年都有唔少名人參加，立法會議員金融界吳亮星（星爺）、會計界梁繼昌、紡織及製衣界鍾國斌（Felix）、體育、演藝、文化及出版界議員馬逢國、胡志偉等不時出現喺參賽者名單上。不過今年一眾議員藉口多多，甩底嘅可能性不少。
今年渡海泳依舊喺維港上演，參加者由鯉魚門三家村公眾碼頭游去鰂魚涌公眾碼頭，全長一點五公里。去年比賽當日只有馬逢國出席，但佢只係在船上做啦啦隊幫參賽者打氣。今年又點呢，暫時已知好多人根本無報名，甚至連自己有無報名都唔知。
馬逢國話，自己剛剛「登六」，要出示醫生證明先可以參加，但佢抽唔到時間做身體檢查，最終不了了之。星爺就話一向係由馬逢國代為報名，但唔清楚今年報咗名未。其實比賽喺八月初時已截止報名，咁講都係唔使預佢喇。至於Felix前年唔使三十八分鐘就游畢全程，曾被冠以「立法會飛魚」美譽，但佢今年亦唔會參加，因為十月忙於立法會事務；加上名人參加嘅優悠組規定參賽者用水泡，佢又覺得飛魚用水泡比賽好肉酸喎。
信心十足嘅仲有胡志偉，佢話之前同咗主辦機構講會參加，但目前仍未掌握到細節，最近忙於地區工作，水都冇乜點練喎。睇嚟又多一個甩底嘅中年喇。
