政壇：蔡冠深傳翻兜掌中總
香港四大商會嘅會長一職，向來係工商界中人兵家必爭之地。近排政圈廣泛流傳，曾出任中華總商會會長嘅現任永遠名譽會長蔡冠深，計劃趁中總明年換屆選舉時，「翻兜」再度出任中總會長，為日後於政界更上一層樓，例如爭取下屆由全國政協委員「升呢」為全國政協常委鋪路。不過，會長之位大把人爭，除幾名副會長如袁武排隊外，仲有常務會董方文雄都係熱門人選，呢場競賽真係好戲在後頭。
先例少之又少
據知，蔡冠深仍未正式向中總表態，熟悉內情人士分析，蔡冠深「翻兜」會長之路勝算係一半半。事關做過中總會長嘅人「翻兜」再任會長嘅先例少之又少，最有印象係前全國人大常委、中總永遠榮譽會長曾憲梓，佢老人家先做第三十九及四十屆嘅會長，事隔多年後再於第四十三屆出任會長。
睇番中總家吓嘅情況，現任會長楊釗明年任期屆滿後，仲有八名中總副會長排緊隊等坐正會長，包括排首位嘅袁武，仲有莊學山、李德麟及林樹哲等人，就算未必人人都有興趣擔正做會長，按照論資排輩嘅不成文規則，一班副會長都未必心甘情願被爬頭。所以蔡冠深翻兜之事，若唔計有政治力量助佢一臂之力，最終能否成事都幾考驗佢嘅人緣。
我哋向蔡冠深查詢，但至截稿前仍未回覆。袁武就笑笑口話未有聽聞此事，不過佢強調中總明年十月先至換屆，現時談論誰做會長言之尚早。佢仲指指自己個頭話：「頭髮白晒喎！」好似暗示自己無意競逐會長一職。
講開又講，曾任多屆中總副會長，今屆轉任常務會董嘅方文雄，過去一直係中總領導層或立法會中總議席熱門繼任人選之一，外界估計方文雄喺「過冷河」後，或等待合適時機更上一層樓。
