城中鏡：搵食秘笈
香港被譽為美食之都，想食咩都幾乎可以搵到，其中灣仔區嘅美食仲多到要標記喺地圖上。灣仔區議會同香港貿易發展局第九次合作推出《食通灣仔》飲食文化地圖，飲食旅遊作家歐陽應霽（阿齋）負責編撰及設計手繪角色插圖。阿齋話雖然佢唔喺灣仔長大，但因為呢區食肆特別多，所以佢不時都會落灣仔搵食，有一排就特別鍾意去食叻沙及車仔麵。
溫少文最愛灣仔茶餐廳，百吃不厭。
伍婉婷（左）及伍斯安（右）都喺灣仔工作，搵食識晒窿路。
《食通灣仔》
歐陽應霽為《食通灣仔》飲食文化地圖做編撰及設計手繪角色插圖。
有齊中西新舊口味
阿齋話，灣仔融合咗新、舊、中、西不同的食肆，有傳統舊式餅店及齋舖，又有新式精緻嘅西餐、意大利菜，想搵邊類型嘅美食都梗有一間喺左近，所以佢閒時搭車經過又肚餓，都會落車搜刮好嘢食。佢又話灣仔亦係一個食材嘅集散地，近年仲開咗一啲賣素食食材嘅店舖，而且仲有其他區較難搵嘅嘢，所以鍾意親自下廚嘅人不妨去尋吓寶。
講到烹飪，灣仔區議員伍婉婷都係愛下廚之人，佢話最拿手係煲湯水。話說有次婦聯要舉辦一個活動，而佢要負責製作紀念品，最後佢煲咗兩大煲羅漢果水，諗住滋潤又實用，估唔到最後反應非常熱烈，一滴都冇得剩，令佢覺得相當滿足。
同場仲有貿發局展覽市場拓展總監溫少文及聖雅各福群會服務主管伍斯安，溫少文話去灣仔最常幫襯嘅始終係茶餐廳，百吃不厭。
而溫少文心目中對茶餐廳熱奶茶亦有一定要求，奶同茶嘅分量要夠均衡，事關奶落得太多就會蓋過茶香，但茶嘅比例太多或太濃，飲落又會變澀，所以飲完之後個口覺得爽滑嘅就係最正嘅奶茶喎。
