近期零售市道吹淡風，街上嘅吉舖都明顯增加，經營飲食業嘅翠華就顯得好淡定，主席李遠康更話，市道唔好，佢哋店舖傾續租時，可能議價能力會好啲添。

李遠康（中）拍心口話，旗下餐廳唔會裁員。

翠華財務官楊東解釋，每年翠華平均有六間香港區嘅店舖需要續租，公司一直同業主關係好好，依家最「老」嗰間舖已經有成四十年歷史，相信可以同業主齊齊共渡時「艱」。李遠康拍晒心口話，佢哋公司無需要亦無可能裁員。

唔講唔知，翠華仲有兩年就迎來五十歲紀念，半個世紀嘅輝煌，佢哋預告一定有慶祝活動，但活動係乜就唔肯講，李遠康仲叫大家畀吓意見喎，食客最鍾意嘅梗係減價同優惠，明啦！

第一手消息請下載on.cc東網iPhone/iPad/Android/Windows Phone Apps