政壇：民陣召集人 火棒冇人接
泛民主派政治能量大蒸發，連帶負責遊行示威嘅民間人權陣線（民陣）政治影響力都大不如前，民陣今年十月就會舉行一年一度嘅換屆選舉，有傳四名正副召集人都會齊齊裸退，佢哋落莊之後，唔會再喺民陣擔任任何職位，弊在到家吓，民陣召集人接任人選都仲未明朗化，原因同召集人呢個位係燙手山芋、吃力不討好有關，只要睇吓之前嘅楊政賢同依家嘅陳倩瑩就知喇，火棒冇人接，頭痕呀。
民陣身為協調泛民示威行動嘅組織，佔領行動期間本來應該坐擁大權，但結果係學生主導，甚至學聯玩晒，民陣由頭到尾都得唔到一個當眼位置。佔領行動結束後，民陣主辦嘅拒絕政改袋住先運動及七一遊行，都慘淡收場，搞到一眾正副召集人無心戀戰。現任召集人陳倩瑩任內打擊多多，簡直係心力交瘁，計劃專心做議員助理工作。至於現時三個副召集人，本身做過召集人嘅楊政賢就話會修讀法律碩士，亦會返中大做兼職，要忙功課又要返工，根本無時間應付民陣工作，大條道理唔接手。而另一副召集人、香港彩虹嘅岑子杰亦都會重返校園，去理大讀副學位課程。
現時呼聲最高就係另一副召集人、做過學聯秘書長嘅陳樹暉，最少佢未做過召集人，唔驚被外界批評「圍威喂」翻炒，但佢本人又唔多想。搞到咁嘅雞飛狗走局面，一眾民陣中人都要反省吓啦。
