政壇：美食車考察團甩轆
財政司司長曾俊華喺今年財政預算案提出要學外國搞美食車，但至今十畫都未有一撇，立法會食物安全及環境衞生事務委員會主席張宇人（Tommy）早前急急提出暑假去美國考察，睇吓當地嘅美食車點營運。個建議事前已經被人質疑，最終得三人參加，更弊嘅係，佢哋原本想去紐約取經，點知當地團體未能接待，卒之連呢個行程都取消埋。真係出「車」不利囉，唔知係咪人丁單薄，當地團體都懶理佢哋呢？
坐飛機時間多過交流
Tommy之前喺委員會會議建議到美國外訪考察美食車，仲話東岸、西岸兩邊都去埋，但隨即被泛民主派議員大潑冷水，就連建制派都因區選臨近而反應麻麻，結果報名冷淡，除咗Tommy外，就只得白鴿黨嘅黃碧雲（一舊雲）及單仲偕兩個報名，建制派冇人響應。呢個「迷你代表團」未出發已經一波三折，首先係佢哋其中一站三藩市因下月中有大型會議，酒店房間供應緊張，所以代表出發時間要由原定下月十三號改到二十號。
原定想參加嘅漁農界議員何俊賢，又因為漁農業界有活動，所以決定唔去。日前，立法會秘書處再通知外訪議員，因為紐約當地部分接待團體未能接見，所以決定今次行程改為只去三藩市一個城市，而原定七日嘅行程亦縮至五日，即下月二十二日出發，二十六日凌晨返港，實際逗留三日多啲，真係坐飛機嘅時間多過真正交流。
一舊雲話，佢哋原本想喺紐約會見美國食品藥品管理局（FDA），了解當地點樣處理食品安全問題，不過有關部門就話紐約人員未能接見，或者會改喺三藩市同有關部門會面，所以取消咗紐約行程，佢哋喺三藩市將會睇美食車，以及去了解當地點樣處理進口食物安全問題喎。其實山長水遠去到留得三日多啲，真係唔去好過去啦！
