黑金案拖泥帶水 淫賤黎仲未落鑊

呢，人稱淫賤黎嘅壹淫媒前主席黎智英喺佔領之亂粉墨登場，唔止係幕後黑手，更加係最大金主。東方報業集團舊年七月先後取得多批密件，揭發淫賤黎過去幾年向不同泛民團體及個人秘密捐款超過四千萬元。醜聞曝光後，全城嘩然，不斷有團體同市民向廉政公署及立法會舉報，要求徹查事件，之後廉署人員分別突擊搜查淫賤黎及其洋助手等人嘅寓所，而多名泛民政客包括李卓人、何秀蘭、張超雄及張國柱等，亦先後被廉記請飲咖啡，點知查咗逾年仲未有下文，亦未有人被落案起訴，你話係咪匪夷所思吖。

正如有學者及立法會議員質疑，黑金醜聞明顯同外國勢力有關，證據確鑿，廉署查來查去都無結果，可能因為案件涉及外國勢力而縮手縮腳啩。

冇錯嘞，呢啲質疑唔係無的放矢（o架）。淫賤黎嘅秘密捐款全部通過嗰位有美國軍方情報背景嘅洋助手，而佢又多次被踢爆同美方人物秘密會面，當中有咩蠱惑，大家心知肚明喇。至於黑金醜聞另一主角、工黨主席兼立法會議員李卓人，更被揭發通過職工盟向美國國家民主基金會旗下組織索取大筆捐款。咁都未算吖，負責調查黑金醜聞嘅某位廉署高官亦被指同美國聯邦調查局人員關係密切，好難唔令人質疑當中有冇角色衝突。

當年滿清政府腐敗不堪，崇洋媚外，有走私商人買通外國人，喺船上掛外國旗橫行霸道，官府投鼠忌器，唔敢執法。今日港府調查黑金醜聞投鼠忌器，拖泥帶水，唔通歷史真係重演？其實，好多國家同地區早就禁止從政者接受外國政治捐款，唯獨香港呢方面無王管，有乜法子唔亂象叢生吖。

點都好喇，傳媒發揮第四權嘅監督功能，令反中亂港嘅妖孽無所遁形，依家個波喺廉署手上，到底係依法辦事，抑或有法不依，市民正拭目以待。當年美國傳媒揭發「水門事件」，最終連總統都要鞠躬落台，凸顯第四權嘅威力，如果港府漠視民意，處理黑金案繼續玩包庇，遲早淪為妖孽嘅陪葬品吖，叮！