城中鏡：樓神拒哈日 置業揀歐洲
人民幣貶值成為熱門話題，港元隨美元而升值，投資上應該有啲乜嘢部署呢？人稱「樓神」嘅長實地產執行董事趙國雄尋日就教人點買外國樓，但佢講到明自己從來唔買日本樓。
趙樓神（左）覺得日本樓市啲錢易入難出，所以唔會買日本樓。
趙樓神尋日出席同系公司泓富產託業績會後話，自己一直鍾情歐洲，喺英國同法國都有買樓收租，已經唔係今日嘅事。不過，就算日圓之前貶值咗咁多，佢都唔會買日本樓，事關佢覺得日本樓市啲錢易入難出，皆因日本人好少由外國人手上買番日本物業。佢仲擺埋紀惠集團行政總裁湯文亮上枱，話「湯文亮覺得（日本樓）係好嘢，我唔知呀，你自己問佢啦」，即時全場大笑。
佢仲話有投資啲穩陣嘢，話依家時勢最好買公用股，佢期期iBond都有捧場，最新iBond 5都入咗好多飛去抽，點知只係抽中一手，只能賺少少，想請大家飲茶都唔得。
