日前人民幣突然大幅貶值,震驚全球。尋日喺一個活動上見到唔少商界人士,講起人仔貶值嘅影響,就有人歡喜有人愁。協成行董事總經理David方文雄同做藥品生意嘅中華總商會青委主席黃楚恒呻話,人仔貶值令資產縮咗水同成本上升。做印刷包裝生意嘅華彩集團主席Allen史立德同中總會董Thomas張俊勇反而開心晒,Thomas直言人仔連續三日貶值,令佢慳番約百分之五成本。

方文雄(左)同史立德對人民幣貶值感受深刻。

袁莎妮外遊返港精神晒。

黃楚恒(右)話匯率波動好正常。旁為張俊勇。

黃楚恒:短期波動正常

David嘅生意以地產同投資為主,佢話十幾年前買落嘅人仔存款縮咗水,集團喺內地嘅投資同樣貶值,所以係受害者。不過,諗深一層,佢十幾年前已識得買人仔,咁多年來人仔累計升值近四成,根本冇得輸。黃楚恒同樣對人仔貶值感肉赤,事關佢哋內地廠房資產係以人民幣計算,內銷市場賺取是人仔,人仔貶值,變相資產貶值。但佢好睇得開,話匯率短期波動好正常,唔使擔心喎。

Allen盤生意就係用美元找數,所以人仔貶值對佢有利。Thomas就喺內地搞緊投資項目,咁啱匯款前人仔接連貶值三日,令佢慳番約百分之五成本。香港總商會行政總裁Shirley袁莎妮都有到場,佢啱啱外遊返港,難怪容光煥發。Shirley同父母乘坐郵輪到日本沖繩玩足七日,期間唔使左騰右騰,歎住休息,梗係精神晒!

第一手消息請下載on.cc東網iPhone/iPad/Android/Windows Phone Apps