政壇：搞搞政：劉江華 張雲正係「冇殼蝸牛」
尋日政府上載新一年政治委任官員及行政會議成員嘅利益申報，比舊年公布嘅時間遲咗一個月，唔知同兩名新獲委任局長有冇關呢？兩名新局長嘅利益申報，民政事務局局長劉江華同公務員事務局局長張雲正，都申報無持有物業、公司股份或擔任受薪董事。劉江華一向都係租樓，估唔到連張雲正都做「冇殼蝸牛」，唔通佢哋都睇淡香港樓市，加入「淡淡」行列，諗住「租樓日日賺」？
設計圖片及對白
劉江華亦申報咗留任建仔嘅贊助會員、由佢創立嘅公民力量會員、香港賽馬會會員等六十七個組織。而佢太太穆斐文、即係廉署社區關係處前處長，依家就報稱「退休前休假」。張雲正除以官方委員身份擔任基本法推廣督導委員會成員外，就只係賽馬會全費會員。但最新嘅發現入面，最重要者莫過於佢仍係單身，官場又多個「鑽石王老五」。
李國章續當「樓王」
至於其他行會成員，李國章就蟬聯「樓王」，佢喺香港及英國倫敦， 以公司名義持有三十二個物業、八個車位，同舊年申報一樣。
問責官員之中，依然由勞工及福利局局長張建宗坐穩「樓王」地位，佢申報香港有九個物業、一個車位，八個均由妻子擁有，一個作家庭成員居住、其餘作出租用途。佢其中一個位於東區嘅單位就改由家庭成員居住，原本中西區嘅單位就變成出租。商務及經濟發展局局長蘇錦樑都係「樓市大好友」，上月九日就簽咗臨時買賣合約，買咗個中西區單位，仲講明係投資添！
不過，政務司司長林鄭月娥就減持海外物業，最新申報已冇咗英國劍橋及劍橋郡，以及蘇州嘅物業，只餘下由丈夫擁有、喺廣東中山嘅一個自用單位同車位。至於教育局局長吳克儉上任時申報持有一間人力資本管理顧問公司，就申報喺今年六月撤銷公司註冊申請，獲公司註冊處批准。
