九月三日係抗戰勝利七十周年，北京將會舉行大型紀念活動，當中以閱兵儀式最受注目，約三百名香港政商要人早前已獲邀參加。「貪曾」前特首曾蔭權爵士亦受到邀請，一向有着數就舔到盡嘅貪曾當然唔會放過呢個機會啦。不過，貪曾畀廉政公署查緊，而且又準備落鑊，是非醜聞纏身，仲要去睇閱兵，都唔知醜字點寫。

曾傳拒絕邀請疑等拉

貪曾上月缺席七．一香港回歸十八周年酒會，日前有報道話佢連下月喺北京天安門舉行嘅閱兵儀式都唔會出席，為此我哋分別問過特首辦同前特首辦公室。前者話閱兵儀式嘅嘉賓名單仍在準備中，遲吓先至公布；而後者尋日終於證實，貪曾數星期前已經接納閱兵嘅邀請。

其實刑事檢控專員楊家雄六月下旬講過三個月內會決定係咪檢控貪曾，即係最遲九月下旬就會有分曉。本來以為貪曾疊埋心水留喺屋企等拉，點知佢依家又話要上北京睇閱兵。不過，貪曾被自己嘅貪腐醜聞纏身，企喺北京天安門睇閱兵時，空氣都可能污濁晒，唔知佢覺唔覺得自己嘅存在係有辱國體呢？

第一手消息請下載on.cc東網iPhone/iPad/Android/Windows Phone Apps