臨近區議會選舉,但預計派出近百人參選嘅白鴿黨竟因人選問題而爆出派系鬥爭。該黨新界東支部兩次以高票否決推薦「80後」沙田區議員麥潤培出選,尋日該黨中委會原定開會覆核申請,但有傳新界東部分議員擔心中委會推翻支部決定,支持麥潤培參選,竟以退黨威脅,搞到中委決定押後處理覆核申請。

麥潤培被指得罪人多,面臨黨內前綫派系封殺。(資料圖片)

其實麥潤培同新界東支部唔咬弦都係公開嘅秘密,有傳佢多次得罪班「前綫系」嘅黨員,好似公然喺社交網站話自己黨友唔靚女,又唔尊重前輩,搞到前綫派系趁機封殺佢。

「前綫系」退黨威脅中委

勢估唔到部分中委會委員竟一面倒撐麥潤培,覺得唔畀一個原區議員再出選,好難同公眾交代,搞到前綫系黨員不惜以退黨威脅中委。兩個派系爭持之下,黨內一啲面面俱圓嘅老大哥就建議不如押後處理,畀多啲時間討論,甚至有人話不如拖到選完先處理添!

雖然麥潤培早幾日自稱無犯任何黨規,所以都唔怕中委會唔支持,但聽聞佢已搵定後路,包括加入公文袋新界東支部,諗住有機會上位選立法會,就算最終過唔到檔,佢亦計劃以青靜動力主席名義參選,睇嚟有晒周詳計劃。

第一手消息請下載on.cc東網iPhone/iPad/Android/Windows Phone Apps