政壇：立會慳皮倡回收Call機
立法會議員一向可以揀用個人手提電話短訊功能或者傳呼機，去接收由立會秘書處所發出嘅緊急訊息。傳呼機逐漸被淘汰，但竟然仲有三十多位議員用緊傳呼機接收秘書處訊息。秘書處尋日提出取消傳呼機服務嘅建議，鼓勵議員改用手提電話。若果成事嘅話，秘書長陳維安又可以為立會慳番筆錢嘞！
設計圖片及對白
秘書處指出，議員攜帶多一個通訊設備實屬不便，傳呼機關上時不能接收訊息，即使啟動後訊息亦無法尋回，因此秘書處鼓勵仍使用傳呼機嘅議員考慮改用電話短訊功能。若所有使用傳呼機嘅議員同意，就會安排回收有關嘅傳呼機，傳呼機服務或會由下一屆立會會期開始取消，成為立會歷史一部分。
王國興怕失聯「甩轆」
金融界議員「星爺」吳亮星都有用傳呼機，但佢對取消傳呼服務就無乜所謂，因為平時部機放辦公室，有新資訊由助理經WhatsApp轉發，但佢認為取消傳呼機，某程度係慳錢又環保。佢平時用WhatsApp多，仲大讚夠方便，就算錯過資訊，群組內其他人都會提醒。工聯會議員郭偉強自稱「現代人」，但佢讚用傳呼機可以一睇就明，反而聽留言信箱都幾嘥時間。但佢就話帶多部機喺身確係唔方便，仲多一分會壞嘅機會。如果電話可以做到傳呼機功能，取代傳呼機都係好事。
但工聯會王國興就有唔同睇法，佢用咗傳呼機十幾年，從無覺得唔方便，而且每當法定人數不足，都係透過傳呼機通知，而趕返會議廳，又係靠傳呼機清楚輪候發言時間，仲話傳媒、公眾都係知佢傳呼機號碼多，如果取消可能會失聯，真係要一段時間先適應到，仲怕唔慣會「甩轆」添！其實要出事嘅，用WhatsApp都會甩轆，佢唔使擔心太多，只要議員間溝通好啲，就無乜問題啦！
