俗語話，有一利必有一弊。資訊科技走入人類日常生活，一方面帶來唔少方便，另一方面亦帶來唔少問題，至於利多抑或弊多，咁就要睇大家點樣衡量喇。

好似近年興起嘅Call車手機應用程式咁吖，隨傳隨到，無疑係方便咗乘客，弊在白牌車有違法之嫌，導致爭議多多，尤其的士業界更加怨聲載道。咁多年來，當局一直闊佬懶理，坐視問題不斷惡化，日前警方至姍姍來遲採取行動，放蛇打擊進軍本港逾年嘅交通軟件公司Uber（優步），拘捕咗五名司機並扣查車輛，罪名係涉嫌「非法駕駛汽車作出租或取酬載客用途」及「駕駛汽車時無第三者保險」。

即係咁，白牌車涉嫌非法載客，除咗多數冇第三者保險，對乘客缺乏保障，而且對的士業界唔公平。家陣一個市區的士牌閒閒地值七百萬元，而白牌車就無本生利，的士司機被搞到冇啖好食，唔嬲就假。警方拖到依家至肯執法，足足慢咗幾拍。

最搞笑嘅係，Uber進軍本港後，商務及經濟發展局轄下嘅投資推廣署仲大吹大擂，喺網頁中聲稱係外商在港經營嘅「成功個案」；而且引述該公司主管話，Uber通過流動應用程式連接乘客和司機，目標係令城市更安全和四通八達，為乘客提供更多交通選擇，為司機帶來更多機會。可惜吖，所謂提供更多選擇和機會，可能係走法律罅嘅咋。

呢嗱，今次警方採取執法行動後，投資推廣署至急急刪除相關網頁，睇見都好笑。該署發言人話喎，喺本港法律規管下，利用手機程式訂車服務有合法嘅經營方式及空間，但並非所有服務均符合法律。咁即係點吖？即係認衰囉。如果話白牌車載客涉嫌違反法例，咁投資推廣署幫白牌車公司宣傳推廣，算唔算係助紂為虐呢？正如有立法會議員話齋，港府後知後覺，唔同部門各自為政，真係諷刺。

其實，呢啲唔止係後知後覺咁簡單，直情係冇知冇覺。喺美國起家嘅Uber近年不斷擴充版圖，被指顛覆租車服務，尤其威脅到傳統出租車生意，因此引起唔少爭議，甚至被部分歐洲及亞洲國家禁止。如果投資推廣署嘅官僚唔係渾渾噩噩，點會對呢啲爭議一無所知，又點會幫白牌車吹噓吖。所以話，信佢一成，雙目失明，港產官僚吹水唔抹嘴，真係信唔過o架，叮！