依家唔少學生喺暑假期間都會搵機會離港交流同實習，當中內地係熱門之選。但近年有好多團體都相繼舉辦同類活動，目的地亦大同小異。香港傑出青年協會今年都有份舉辦北京交流團，協會主席Mickey甄韋喬透露，呢類內地交流活動早幾年就吃香，但依家選擇比以前多，想吸引學生參加都唔易，意思即係團體之間爭客都爭崩頭。

甄韋喬（左）同余嫿指內地交流團冇往年咁吃香。

洪為民把握暑假時間，同個仔傾吓將來發展。

梁宏正都擔心鉛水問題，考慮喺屋企裝濾水器。

傑出青年協會早前舉辦明日領袖高峰論壇「『劃』出明日彩虹」活動，Mickey話協會今年搞嘅北京交流團反應麻麻，學生明顯冇過往咁踴躍，可能係同近年籌辦內地交流團增多有關，分薄咗有興趣報名嘅學生人數。此外，依家除咗北京、上海等大城市外，幾乎各個省份都有交流團，啲學生去過一個地方之後，翌年就會選擇其他地方，所以即使佢哋出錢出力搞青年活動，喺面對咁多競爭嘅情況下，都要絞盡腦汁先吸引到學生。

梁宏正防鉛靠朋友

協會秘書長余嫿、菁英會前主席梁宏正同互聯網專業協會會長洪為民等人都在場，講起個仔放暑假，洪為民話早前同個仔食早餐時傾過將來想讀乜嘢科目同工作等問題，佢話個仔有諗過讀法律，所以佢就搵咗個律師朋友同阿仔傾偈，分享有關經驗。

至於近期爆出食水含鉛問題，洪為民就話自己住嘅唔係新落成樓宇，加上佢屋企有裝濾水器，所以唔太擔心。相反身旁嘅梁宏正家中就冇安裝濾水器，見依家咁嘅情況，都考慮緊裝唔裝好，打算睇身邊啲朋友用成點先，而佢都有朋友售賣相關產品，會開始留意同格吓價喎。