「紅籌之父」梁伯韜月前多咗個新朵，係上市公司商會主席。佢最近接受上市公司商會自家刊物《Momentum》訪問時，大談自己喺辦公室以外嘅興趣。估吓係乜？跑車、遊艇等通通唔係，而係投資，佢話視投資為嗜好，仲特別鍾意投資喺「殺手」身上！

梁伯韜視投資為嗜好，仲特別鍾意投資喺「殺手」身上。（資料圖片）

梁伯韜講緊嘅，係一啲「品類殺手」（Category Killers）式嘅企業。「品類殺手」係乜？就係嗰啲間舖大到、啲貨多到可以趕絕晒啲小商店嘅嗰啲零售專賣店，即係賣家居裝修嘅「家得寶」（Home Depot）同「玩具反斗城」呢類。佢哋賣嘅貨類專，但單品多，小店通常好難鬥。

識揀，一定要揀投資「殺手」？點解呢？梁伯韜就話，呢啲「殺手」提供嘅服務有顛覆性、有助降低成本、提高效率，兼提高大家生活質素咁話。