「貪曾」前特首曾蔭權爵士二○一二年卸任前被揭發「貪盡海陸空、歎盡省港澳」貪腐醜行,最終被廉政公署調查。刑事檢控專員楊家雄六月下旬就話,三個月內就會決定係咪檢控貪曾,換言之最遲九月下旬就有分曉,而楊家雄仲話貪曾作為前特首唔會「走咗佬」。面對隨時落鑊,一向有着數就舔到盡嘅貪曾近期似乎已減少蒲頭,聞說下月三日抗戰勝利紀念日嘅天安門閱兵,佢都婉拒出席,有騷都唔睇,唔通佢真係匿喺屋企坐定定喺度等拉?

有傳「貪曾」曾蔭權婉拒出席下月天安門閱兵儀式,莫非準備等拉?(資料圖片)

貪曾上月已缺席咗今年七.一香港回歸十八周年酒會,有報道話,今年九月三日喺北京天安門舉行嘅閱兵儀式,官方都有邀請貪曾,但貪曾就婉拒咗唔赴會。我哋有問過特首辦係唔係有邀請貪曾出席閱兵儀式,特首辦就話閱兵儀式嘅嘉賓名單依然準備中,遲吓會公布喎。我哋亦都問過前特首辦公室,貪曾係咪唔去睇閱兵、理由係乜嘢?不過,對方就未有回覆。

今次喺天安門舉行嘅閱兵儀式係為咗紀念抗戰勝利,貪曾貪腐醜聞纏身,猶如過街老鼠,如果佢有自知之明,都應該明白出席有辱國體,邀請貪曾出席嗰個就更加唔知點諗嘢喇!