到十月立法會開波就會進入最後一個立法年度，泛民主派同建制派之間嘅矛盾白熱化。由於上個立法年度，泛民玩「突襲」冧友佔領財務委員會轄下嘅工務小組同人事編制小組兩個委員會，搞到政府涉及工程同加開首長級職位撥款時困難重重，兼且又好似審犯咁，玩殘申請候補加入小組嘅建制派議員。正所謂「有仇不報非君子」，有建制派議員講到明，嚟緊一年必定冧友落各個小組委員會，誓要全奪主導權。

至於建制派係咪會搶盡全部委員會嘅正副主席，據聞佢哋都有唔同睇法，強硬派就話一不做二不休，好似內務委員會副主席之位，如果泛民強行推薦衞生服務界李國麟以外嘅人選，建制派就會派陳克勤搶埋呢個副主席位，甚至不惜破壞之前協議，搶埋可能由工黨何秀蘭同李卓人分別執掌嘅教育事務委員會同公務員及資助機構員工事務委員會主席之位。

不過，建制派內嘅溫和派就覺得唔應該去到咁盡，一旦反晒面，泛民可能喺唔同場合玩嘢，同樣可以搞到建制派雞毛鴨血，到時「殺敵一千、自損八百」，兩敗俱傷都無謂。加上富貴黨未必跟足主流建制派路線，唔係全部人都咁團結，到時再出現多單類似「等埋發叔」嘅事件，建制派無能形象就真係用漂白水都漂唔甩喇！不過，建制派上年度受盡泛民嘅氣，相信最後未必咁仁慈，預料同泛民反枱收場。