俗語話「執輸行頭，慘過敗家」，公文袋可以話係呢期嘅佼佼者，遠嘅有鉛水事件，莫講話飲頭啖湯，就連其他泛民主派搞嘅記者會都冇佢哋份，要唱「獨腳戲」。到路政署上周突然斬去半山般咸道四棵石牆樹，公文袋等人又到尋日先去申訴專員公署投訴同追究責任。其實選舉在即，各黨派對大小民生議題都非常着緊，但公文袋喺處理鉛水同斬樹兩大議題上都慢幾拍，唔通真係散散哋？

陳淑莊錯怪當局別親疏

公文袋副主席Tanya陳淑莊同立法會議員陳家洛，喺斬樹事件過咗差唔多一星期先去申訴專員公署投訴路政署、民政事務總署同樹木辦，追究四棵石牆樹被斬嘅責任。Tanya話路政署指決定斬樹係因為石牆出現裂痕，但石牆並非支撐古樹嘅護土牆，質疑路政署有誤導公眾、區議員同專家之嫌。

其實公文袋今次唔止慢幾拍，連事情嘅始末都未搞清楚。好似Tanya批評民政事務總署事前只通知中西區嘅建制派區議員，質疑署方嘅做法親疏有別；又話依家正值颱風同雨季，唔追究政府斬樹嘅理據，遲吓就會有大量樹木被斬。實情係路政署喺斬樹當晚大約七點半鐘，已透過電郵通知所有中西區區議員，事後有份去般咸道掛氣球抽水嘅白鴿黨「老嫩鴿」許智峯同鄭麗琼都承認收過電郵，咁又何來有Tanya講嘅親疏有別呢？估唔到冇做議員就脫晒節。

抽水嘅嘢真係有心唔怕遲，好似社民連立法會議員「長毛」梁國雄咁，尋日自爆自資抽驗立會嘅水質，由於唔太夠錢，所以只能夠抽四至五個樣本去驗，好彩嘅係化驗結果顯示水質冇問題。長毛仲話為咗驗水，佢特登喺立會過一晚夜，抽隔夜水去驗。除咗立會，佢喺所住嘅公屋都攞咗個樣本去化驗，結果都係冇問題嘅，可以放心飲用。

路署解畫受限地理環境

面對各方質疑，路政署喺尋晚約十時半發放般咸道四棵石牆樹緊急移除事件報告嘅英文版本，報告長達二十九頁，指早喺一三年已發現有唔同程度嘅風險，當局已加強監察，並曾研究九個補救方法，但喺今年七月二十二日，其中一棵樹塌下後，另外一棵情況不佳嘅樹木也被移除，餘下四棵樹雖曾作修剪以減風險，但因後來發現圍牆出現裂痕，上述樹木嘅支撐部分受影響，並有惡化迹象，有隨時倒下嘅危險，因受地理環境限制同冇其他可行方法，所以決定喺本月七日緊急移除。